Киевский синопсисКниги / Киевский синопсисСтраница 59
Бесурмане же видяще толикую нечаемую в Христианских воех храбрость и мужественное сердце их, аки сердце льва на лов го&товаго, абие нечестивыи падше в страх и трепет, растаяшася падше в страх и трепет, растаяшася в мнимой крепости сил своих поганских, от шанцов же и от всех армат (пушек) больших и меньших оружий огненных, от наметов и от всяких запасов своих отбегоша, стремглав един другаго предваряющи и друг друга оставляющи утекаху, аможе очима зряху, яко и ту исполнитися писанному, поженет един тысящу и два двигнета тмы . Ибо стрелы православных воев изобильно упишася от крове Бесурманския, и меч без числа снеде мяс их поганских, начальных, Башей и Мурз; много же и живых поган в руцех Христианскаго войска остася, и утекающии на своих же мостах, на реце Тясмини помощенных, от великаго страха и тесноты многое множество подавися, с мостов спадающе, и без числа потопишася. Наметы же, арматы (пушки), запасы и многии корысти неприятельскии храброму его Царскаго пресветлаго Величества воинству досташася. Тогда все Христоименитыи вои утешахуся крепостию силы Бога Вседержителя, хваляще и величающе его, яко единаго победителя, побеждающаго и смиряющаго врага вознесенную гордыню, дающаго же неоскудно крепость православному Цареви нашему, и возносящаго рог Христа своего.
114.
О ПРИШЕСТВИИ ПОД ЧИГИРИН
войск православных.
ПО ТОЛИКОЙ ТОРЖЕСТВЕННОЙ победе над Бесурманами вси обозы ратнии Царскаго Величества и войск Запорожских на гору вышереченную воздвигшеся, приидоша под Чигирин Августа 4 числа и сташа под городом над рекою Тясминем. Тогда жестокосердый враг Визир Турецкий от презельныя туги и студа своего, ради великия пагубы своих нечестивых, еле богохульныя души своея не испроверже. Все же оставшие Бесурмане устремилися бяху всеконечне на бегство, а православныи войска в победительном торжестве суще, надеяхуся всяко тому супостату падшему уже не востати. Лютый же супостат Христанскаго рода Диавол, от обилия своея злобы, лукаваго онаго Визира, яко свойственный свой сатанинский сосуд, от последняго уныния и малодушия, аки от смертоноснаго сна возбуждши, пусти его оставшия вои Бесурманския от намереннаго бегства удержати. Той же мало помалу в чувство пришедши, исполнися ярости и всякия неправды, и размысли, яко уже не возможно воинскими приступами града Чигирина взяти и явным боем противу мужественных сил Христианских постояти, вдадеся в тайныя злохитрныя коварства, в них же непрестанно упражняшеся дотоле, и яко тать подкопавшеся землею под нижний город, восхити его и огнем сожже. Ратныи же его Царскаго пресветлаго Величества с арматами, всяким оружием и запасами вышедши из города верхняго, зажгоша его, а сами цело проидоша к обозом сил Государских и Козацких полков.
115.
О ВОЗВРАЩЕНИИ ВОЙСК
Христианских от Чигирина, и о убегших Турках и Татарех от войск православных.
ПО ЧИГИРИНСКОЙ ЖЕ БРАНИ его Царскаго пресветлаго Величества рати и войска Запорожския возвратившеся к Днепру, сташа паки в прежних своих шанцах на поле Бужинском, при брезе Днепровом. Но врази Креста Господня аще и ослабели бяху в истомленных силах своих поганских, грехами нашими поощрены, дерзнуша паки на брань. Ибо сам Визир с всеми своими Турскими силами и Хан с своими Татарскими ордами в след за войсками Царскаго Величества подвигнушася и начаша всеми силами от всех стран, наипаче 14 числа Августа в среду, налегати, хотяще православных яко гладнии зверие всячески пожреши. Обаче силы его Царскаго пресветлаго Величества с войсками Запорожскими и ту стройным управлением искуснаго вождя наставлены, толикий бой сведоша с погаными, еликий нынешняго веку не бяше виденый. Тамо бо гласы до небес возвышахуся от превелика клича безчисленных воев; тамо солнце затмися ради прегуста дыма от огненныя стрельбы восходяща; ту воздух помрачися от праха земли конскими копытами горе возбиеннаго; тамо мняшеся земле возстонати от превеликих сил воинских на ней брань отяготивших; ту стрелы от многочисленных луков испущенныя, яко прегустыя капли дождевныя; тамо кули (ядра) от великия и меньшия стрельбы яко огненный град исхождаху; тамо гласы стрельбы огненныя аки страшные громы слышахуся; ту мечи обнаженныя аки молния блещахуся; тамо руце Христианския омышася в крови поганской. Ибо в том бою многии от самых лучших Богатырев поганских начальных, а простых безчисленныя телеса в труп падоша. Но не у кончина. Жестокосердии бо Бесурмане по толиком падении своем еще седмь дний над Днепром промедлиша, ополчающеся окрест обозов воинств Христианских, страшными стреляньми из многих и великих армат (пушек) день и нощь настояху, и шанцы своя по различным местам заводяще, всякии промыслы на одоление творяху. Силы же Царскаго Величества и войска Запорожскии храбро и мужественно стояху против Бесурманов, и многое множество на всяк день и час исходяще из обозов, побиваху и неизреченныя пакости воинскими промыслы и храбростию своею содеваху нечестивым, овых убивающе, овых уязвляюще, овых живых восхищающе, яко превеликих ради налог и смертоносных теснот нужда бяше нечестивым в силах своих ослабети и изнемогши. Наконец видяще Бесурмане, яко уже отнюд не возможно стерпети сильныя храбрости и крепкаго мужества воев Христианских, понудишася от превеликаго страха, не яко воины в начале показавшиися, но уже яко татие, в нощи тайно отбегши воспять (с девятагонадесять на двадесятый день Августа) на вечный студ свой и всенародное поношение, и едва в третией части сил своих Бесурманских и то с великою нуждою своею в свояси уйти возмогоша. Но силы его Царскаго пресветлаго Величества и войска Запорожскии в целости по домам разыдошася благодаряще Бога.